EDITORS PICK

ഓഹരിവിപണിയില്‍ നടക്കുന്ന ഇൻട്രാഡേ ട്രേഡിങ്ങ് അനുവദനീയമാണോ? ഈ ഇടപാടുമായി ബന്ധപ്പെട്ട ഇസ്ലാമിന്‍റെ നിലപാടെന്താണ്?

| ചോദ്യകർത്താവ് ‍   അബ്ദുൽ ഫത്താഹ്
| മറുപടി നൽകിയത്    മുബാറക് ഹുദവി അങ്ങാടിപ്പുറം

അല്ലാഹുവിന്‍റെ തിരുനാമത്തില്‍, അവനാണ് സര്‍വ്വസ്തുതിയും, മുഹമ്മദ് നബി (സ്വ)യിലും കുടുംബത്തിലും അനുചരന്മാരിലും അല്ലാഹുവിന്റെ സ്വലാത്തും സലാമും സദാ വര്‍ഷിക്കട്ടേ. ഓഹരിവിപണിയില്‍ ബിസിനസ് ചെയ്യുന്ന കച്ചവടക്കാര്‍ പെട്ടന്നുള്ള ലാഭപ്രതീക്ഷയില്‍ ഒരേ ദിവസം തന്നെ ഓഹരികള്‍ വാങ്ങുകയും വില്‍ക്കുകയും ചെയ്യുന്ന പ്രത്യേകമായ ഇടപാടിനാണല്ലോ Intraday Trading എന്ന് പറയുന്നത്. ചോദ്യകര്‍ത്താവിനെ പോലെ മറ്റുവായനക്കാര്‍ക്കും INTRADAY TRADING എന്താണെന്ന് മനസ്സിലാക്കാന്‍ ഒന്നുകൂടെ വിശദീകരിക്കാം. ഓഹരിവിപണിയിലെ ഒരു വ്യാപാരി എന്ന നിലയിൽ, ഹ്രസ്വകാലത്ത് വലിയ ലാഭം കൈവരിക്കുന്നതിന് ഒരാൾക്ക് ഓഹരി മാർക്കറ്റിൽ നിന്ന് ഓഹരികൾ വാങ്ങാനോ വിൽക്കാനോ കഴിയും. നമുക്കറിയാവുന്നത് പോലെ മാർക്കറ്റ് മുകളിലേക്കോ താഴേക്കോ പോകുന്നതൊടൊപ്പം തന്നെ ഷെയറുകളുടെ വിലയും എപ്പോഴും ഏറ്റവ്യത്യാസം ഉണ്ടായിക്കൊണ്ടിരിക്കുന്നു. വ്യാപാരികൾ വിപണിയിലെ ചാഞ്ചാട്ടത്തെ ലാഭം കൊയ്യാനായി പൂർണമായി ഉപയോഗിക്കുന്നു. ഇൻട്രാഡേട്രേഡ് എന്നത് പേരുകൊണ്ട് മനസ്സിലാകുന്നത് പോലെ തന്നെ ഒരു ദിവസത്തിനുള്ളിൽ തന്നെ ഓഹരികൾ വാങ്ങുകയും വില്‍ക്കുകയും ചെയ്യുന്ന പ്രക്രിയയാണ്. ഡേട്രൈഡ് നടക്കുന്ന അസറ്റുകള്‍ പൊതുവെ സ്റ്റോക്കുകള്‍, കറന്‍സികള്‍, ചരക്കുകള്‍ എന്നിവയാണ്. ഇവിടെ ഓഹരികൾ വാങ്ങുന്നത് നിക്ഷേപം നടത്താനല്ല, മറിച്ച് സ്റ്റോക്ക് സൂചികകളുടെ ചലനം പ്രയോജനപ്പെടുത്തി ലാഭം നേടുന്നതിനാണ്. അങ്ങനെ, സ്റ്റോക്കുകളുടെ വിലയിലെ ഏറ്റക്കുറച്ചിലുകൾ സ്റ്റോക്കുകളുടെ ട്രേഡിംഗിൽ നിന്ന് ലാഭം നേടാൻ സഹായിക്കുന്നു. പ്രധാനമായും രണ്ടുതരത്തിലാണ് ഈ കച്ചവടം നടക്കുന്നത്. ഉദാഹരണസഹിതം വിശദീകരിക്കാം. ഒരു വാഹനനിര്‍മാണകമ്പനി (ABC എന്ന് നമുക്ക് പേരിടാം) അതിന്‍റെ അസറ്റിന്‍റെ ഷെയറുകളായി 1000 ഷെയറുകള്‍ മാര്‍കറ്റിലേക്ക് നല്‍കുന്നു. പലരും 10, 20, 100, 150 ഒക്കെ ഷെയറുകളായി അവ വാങ്ങുന്നു. ABC കമ്പനിയുടെ നിലവാരമനുസരിച്ച് ഈ ഷെയറുകളുടെ വില ദിവസേന കൂടുകയും കുറയുകയും ചെയ്യും. നിലവാരമാറ്റമനുസരിച്ച് ഈ ഷെയറുകളില്‍ വാങ്ങലുകളും കൊടുക്കലുകളും നടക്കുന്നു. മാര്‍ക്കറ്റ് നിരീക്ഷിക്കുന്ന ഒരാള്‍ രാവിലെ 9.15 ന് മാര്‍ക്കറ്റ് ഓപണ്‍ ആകുന്ന സമയത്ത് ABC കമ്പനിയുടെ ഷെയര്‍ വില ഇപ്പോള്‍ കുറവാണെന്നും ഇന്ന് വൈകുന്നേരം മാര്‍ക്കറ്റ് ക്ലോസ് ആകുമ്പോള്‍ ഈ ഷെയറുകളുടെ വില കൂടുമെന്നും ഊഹിച്ച് കുറച്ച് ഷെയറുകള്‍ വാങ്ങുന്നു. സാധാരണ ഇങ്ങനെ ഷെയര്‍ വാങ്ങികഴിഞ്ഞാല്‍ അതിന്‍റെ ഡെലിവറി നടക്കാനും ഡോക്യുമെന്‍റേഷന്‍ നടക്കാനും രണ്ടുദിവസത്തിലധികം വേണ്ടിവരുന്നുണ്ട്. എന്നാല്‍ ഈ വ്യാപാരി ഇന്‍ട്രാഡേട്രൈഡ് എന്ന ഓപ്ഷന്‍ സെലെക്ട് ചെയ്താല്‍ അതിന്‍റെ ഡെലിവറി പ്രോസസ് നടക്കുകയില്ല. പകരം ഇന്ന് മാര്‍ക്കറ്റ് ക്ലോസ് ആകുന്നതിന് മുമ്പ് അദ്ദേഹം വാങ്ങിയ ഷെയറുകള്‍ മറ്റാര്‍ക്കെങ്കിലും വില്‍ക്കുന്നു. മാര്‍ക്കറ്റ് ക്ലോസിങ്ങിന് മുമ്പ് തന്‍റെ കയ്യിലുള്ള ഷെയറുകളുടെ നിലവാരം നോക്കി ലാഭം നേടാന്‍ വേണ്ടി വാങ്ങിയ അതേദിവസംതന്നെ അയാള്‍ ഇത് മറിച്ച് വില്‍ക്കുന്നു. കുറഞ്ഞ വിലയ്ക്ക് വാങ്ങാനും ഉയർന്ന വിലയ്ക്ക് വിൽക്കാനും കഴിയണമെങ്കില്‍ കുറഞ്ഞ സമയത്തിനുള്ളില്‍ മാര്‍കറ്റിന്‍റെ ഭാവി പ്രവചിക്കാന്‍ കഴിയണം. സമീപഭാവി പ്രവചിക്കാൻ, സമീപകാലത്തായി ആസ്തി വിലകളെ ബാധിക്കുന്ന ഘടകങ്ങൾ കൃത്യമായി വിലയിരുത്തുകയാണ് ചെയ്യാറുള്ളത്. വാർത്ത, കാലാവസ്ഥ, ഉപഭോക്തൃ വികാരം, വരാനിരിക്കുന്ന ട്വീറ്റുകൾ, ധനനയ പ്രഖ്യാപനങ്ങൾ, ധനനയ പ്രഖ്യാപനങ്ങൾ, വ്യാപാര യുദ്ധം സംഭവവികാസങ്ങൾ, പലിശനിരക്ക് മാറ്റങ്ങൾ, ആളുകൾക്ക് എങ്ങനെ തോന്നുന്നു, ശരാശരി താപനില, വ്യാപാരികളുടെ മാനസികാവസ്ഥ എന്നിവ ഈ ഘടകങ്ങളിൽ ചിലത് മാത്രം. ചുരുക്കത്തില്‍ രാവിലെ ABC യുടെ 100 ഷെയര്‍ വാങ്ങിയ ആള്‍ വൈകുന്നേരം ആ നൂറ് ഷെയര്‍ മറിച്ചു വില്‍ക്കുന്നു. വ്യാപാരിയുടെ ഊഹത്തിന്‍റെ കൃത്യതക്കനുസരിച്ച് ലാഭമോ നഷ്ടമോ ആയേക്കാം. ഇനി, രണ്ടാമത്തെ രീതി, വ്യാപാരി മാര്‍കറ്റ് നിരീക്ഷിച്ച് ഏതെങ്കിലും ഷെയറിന്‍റെ വില കൂടുതലാണെന്നും അത് വൈകുന്നേരം മാര്‍കറ്റ് ക്ലോസ് ചെയ്യുമ്പോള്‍ കുറയുമെന്നും കണക്ക് കൂട്ടുന്നു. അപ്പോള്‍ തന്‍റെ കയ്യിലില്ലാത്ത ഈ ഷെയറുകള്‍ രാവിലെ അയാള്‍ മറ്റൊരാള്‍ക്ക് അപ്പോഴത്തെ വിലപറഞ്ഞ് വില്‍പന നടത്തുന്നു. വൈകുന്നേരം വില കുറയുമ്പോള്‍ ആ ഷെയറുകള്‍ കുറഞ്ഞവിലയില്‍ വാങ്ങാമെന്ന് അയാള്‍ ഈഹിക്കുന്നു. അന്നേദിവസം മാര്‍കറ്റ് ക്ലോസ് ചെയ്യുന്നതിന് മുമ്പ് അദ്ദേഹം വില്‍പന നടത്തിയ ഷെയറുകള്‍ വാങ്ങല്‍ നിര്‍ബന്ധമാണ്. രണ്ടാമതായി പറഞ്ഞ ഈ രൂപത്തില്‍ വ്യാപാരി വില്‍പന നടത്തുന്നത് തനിക്ക് ഒരു അവകാശവുമില്ലാത്ത വസ്തുവാണെന്ന് മനസ്സിലാക്കിയാല്‍ തന്നെ അത് അനുവദനീയമല്ലെന്ന് പെട്ടന്ന് മനസ്സിലാക്കാം. ചുരുങ്ങിയ രീതിയില്‍ എന്താണ് ഡേട്രൈഡ് എന്ന് മനസ്സിലായല്ലോ. ഇനി ഇതിലെ ഇസ് ലാമികമാനം പഠിക്കാം. ആദ്യമായി മനസ്സിലാക്കേണ്ടത് ഇതിലെ ഇടപാടുകാരെ കുറിച്ചും ഇടപാടുകാരുടെ ക്രയവിക്രയങ്ങളിലെ മതനിയമസാധുതകളെ കുറിച്ചുമാണ്. ഏതൊരു ബിസിനസിലും ശ്രദ്ധിക്കേണ്ടതുപോലെ തന്നെ ഇവിടെയും ഇടപാടുകാര്‍ക്കും ഇടപാടിനും ഇടപാട് നടക്കുന്ന ചരക്കിനുമെല്ലാം ഇസ് ലാം നിര്‍ദേശിച്ച നിബന്ധനകള്‍ ശരിയാവുന്നുണ്ടോ എന്ന് നോക്കണം. ഡേട്രൈഡിംഗിനെ കുറിച്ച് മാത്രം നമുക്ക് ചര്‍ച്ച ചുരുക്കാം. ഇവിടെ നാം ഇടപാട് നടത്തുന്ന കമ്പനിയുടെ പ്രോഡക്ടുകള്‍ ഹലാലായ കച്ചവടം നടത്താന്‍ പറ്റുന്ന പ്രോഡക്ടുകള്‍ ആണോ എന്നും അവരുടെ ഷെയറുകള്‍ ഹലാലായ ഷെയറുകള്‍ ആണോ എന്നും അറിയണം. നാം അവരുടെ അസറ്റ് വാങ്ങുന്നതോടെ ആ കമ്പനിയുടെ ഒരു ഷെയര്‍ ഉടമയായി നാമും മാറുന്നു. ഷെയറിന് ഇസ്ലാം പറഞ്ഞ ഒരുപാട് നിബന്ധനകളുണ്ടല്ലോ. ലാഭവും നഷ്ടവും മുടക്കുമുതലിന്‍റെ അനുപാതമനുസരിച്ച് പങ്കുവെക്കണം എന്നത് തന്നെ പ്രധാനം. ഇത്തരം ശര്‍ത്തുകളെല്ലാം പാലിക്കുമ്പോഴേ ശെയര്‍ ചേരാന്‍ പറ്റൂ. അതുപോലെ ഷെയറുകള്‍ കച്ചവടം നടത്തുമ്പോള്‍, കച്ചവടത്തില്‍ പറയപ്പെട്ട എല്ലാ നിബന്ധനകളുമുണ്ടോ എന്ന് ശ്രദ്ധക്കണം. നമുക്ക് അവകാശമില്ലാത്ത ഒരു വസ്തുവിനെ നമുക്ക് വില്‍ക്കാന്‍ കഴിയില്ലല്ലോ. അതിനെ ഇസ്ലാം അംഗീകരിക്കുന്നുമില്ല. നാം വാങ്ങാനുദ്ദേശിക്കുന്ന വസ്തു നമ്മുടെ കയ്യിലെത്തുംമുമ്പ് മറിച്ചുവില്‍ക്കാന്‍ പാടില്ലെന്ന നിയമവും ഇവിടെ പ്രത്യേകം ശ്രദ്ധേയമാണ്. ഡേട്രൈഡില്‍ ഓഹരിവ്യാപാരിക്ക് താന്‍ വാങ്ങിയ ഓഹരികൾ അവന്റെ പേരിലേക്ക് മാറ്റുന്നതിനുമുമ്പ് മറിച്ചു വിൽക്കുന്നത് ശരീഅത്തിൽ അനുവദനീയമല്ല. ഉടമസ്ഥാവകാശം നിയമാനുസൃതമായി കൈമാറ്റം ചെയ്യുന്നതിന് മുമ്പ് അവ മറ്റൊരു പാർട്ടിക്ക് വിൽക്കാൻ അവന് കഴിയില്ല, അതായത് ഓഹരി വാങ്ങുന്നയാൾ, അയാൾ‌ക്ക് ഓഹരികൾ‌ സ്വന്തമാണെങ്കിൽ‌ പോലും, അവ ഇപ്പോഴും വിൽ‌പനക്കാരന്‍റെ പേരിൽ രജിസ്റ്റർ‌ ചെയ്‌തിരിക്കുന്നതിനാൽ അവ കൈവശപ്പെടുത്തിയിട്ടില്ല. വാങ്ങിയ സാധനങ്ങൾ കൈവശം വയ്ക്കുന്നതിന് മുമ്പ് വിൽക്കുന്നത് വിലക്കപ്പെട്ടതായി നിരവധി ഹദീസുകള്‍ കാണാം. നബി(സ്വ) പറഞ്ഞു: ആരെങ്കിലും ഒരാള്‍ ഭക്ഷണവസ്തു വാങ്ങിയാല്‍ അത് അളന്നുതിട്ടപ്പെടുത്തി കൈമാറുന്നതുവരെ മറ്റൊരാള്‍ക്ക് വില്‍ക്കാന്‍ പാടില്ല. (ബുഖാരി-2133,2136, മുസ് ലിം-3913,3915,3916,3917,3919,3921,3922,3925, അബൂദാവൂദ്-3494,3498,3499, തുര്‍മുദി-1291, നസാഈ-4595,4596, ഇബ്നുമാജ-2226, 2227) ഹദീസ് ഭക്ഷണത്തെ കുറിച്ചാണെങ്കിലും ഈ നിയമം എല്ലാവിധചരക്കുകളിലും ബാധകമാണെന്ന് പണ്ഡിതന്മാര്‍ വിശദീകരിച്ചിട്ടുണ്ട്. അതാണ് പ്രബലാഭിപ്രായവും.കൂടാതെ ഇതേ ആശയത്തിലുള്ള പരശ്ശതം ഹദീസുകള്‍ വേറെയും കാണാം. കര്‍മശാസ്ത്രഗ്രന്ഥങ്ങളില്‍ ‘കൈവശപ്പെടുത്തുന്നതിനു മുമ്പുള്ള കച്ചവടച്ചരക്കിന്‍റെ നിയമങ്ങള്‍’ എന്ന തലക്കെട്ടോടെ ഈ വിഷയം വിശദമായി ചര്‍ച്ച ചെയ്യപ്പെട്ടിട്ടുണ്ട്. കച്ചവടം നടത്തുക എന്നതും വസ്തു കൈവശപ്പെടുത്തുക എന്നതും രണ്ടാണ്. കച്ചവടം ചെയ്ത ശേഷം വസ്തു കൈവശപ്പെടുത്തല്‍ നടന്നാലേ അതില്‍ ക്രയവിക്രയം ചെയ്യാന്‍ വാങ്ങിയ ആള്‍ക്ക് കഴിയുകയുള്ളൂ. കൈവശപ്പെടുത്തുക എന്ന നിബന്ധന ഓരോ ചരക്കിന്‍റെയും സ്വഭാവത്തിനും പൊതുരീതികള്‍ക്കും അനുസരിച്ച് പലരീതിയിലും ഉണ്ടാവാം. രേഖകള്‍ കൈമാറുക, വസതു തന്നെ കൈമാറുക, തുടങ്ങിയ പല രീതികളും ആകാം. ഡേട്രൈഡ് എന്ന ഓപ്ഷന്‍ തെരഞ്ഞെടുക്കുന്നതോടെ കച്ചവടം നടക്കുന്നുവെങ്കിലും കൈവശപ്പെടുത്തല്‍ നടക്കുന്നില്ലെന്നാണ് മനസിലാകുന്നത്. എന്നാല്‍ വാങ്ങുന്നയാളുടെ അക്കൌണ്ടിലെക്ക് ഷെയറുകൾ‌ രജിസ്റ്റർ‌ ചെയ്യപ്പെടുകയോ അല്ലെങ്കിൽ‌ അയാളുടെ ഓൺ‌ലൈൻ‌ വാലറ്റിലേക്ക് അവ മാറ്റപ്പെടുകയോ ചെയ്യുന്നത്, സ്റ്റോക്ക് എക്സ്ചേഞ്ചുകളുടെ നിർ‌വ്വചനങ്ങൾ‌ക്കും പ്രാക്ടീസുകൾ‌ക്കും അനുസരിച്ച് ഷെയറുകൾ‌ കൈവശപ്പെടുത്തുന്നതിനുള്ള സ്വീകാര്യമായ മാർ‌ഗ്ഗമായി കണക്കാക്കുന്നുവെങ്കിൽ‌ അത് ശരീഅത്തിലും കൈവശപ്പെടുത്തലായി പരിഗണിക്കാമെന്നും അങ്ങനെയാകുമ്പോള്‍ കൈവശപ്പെടുത്തുന്നതിന് മുമ്പ് മറിച്ച് കച്ചവടം ചെയ്യുക എന്ന കുഴപ്പം ആരോപിച്ച് ഡേട്രൈഡ് അനുവദനീയമല്ല എന്ന് പറയാനൊക്കില്ല എന്നും ചില ആധുനികപണ്ഡിതരുടെ ഫത്'വകള്‍ കാണാം. അവ പരിഗണിച്ചാലും ശെയര്‍, കച്ചവടം എന്നിവയില്‍ പാലിക്കേണ്ട നിബന്ധനകള്‍ പൂര്‍ണമായി ശ്രദ്ധിക്കപ്പെുടുന്നുണ്ടെങ്കിലേ മൊത്തത്തില്‍ ആ ഇടപാട് ശരിയാണെന്ന് പറയാനൊക്കൂ. ചുരുക്കത്തില്‍ ഷെയര്‍കച്ചവട നിബന്ധനകള്‍, വാങ്ങല്‍വില്‍പന നിബന്ധനകള്‍, എല്ലാം ശരിയാകുമ്പോള്‍ മാത്രമേ ഏത് ഇടപാടും ശരിയാകുന്നുളളൂ. അങ്ങനെ നോക്കുമ്പോള്‍ ഡേട്രൈഡ് ഹലാലാകാനുള്ള വകുപ്പുകള്‍ കണ്ടെത്താന്‍ കഴിയാതെ വരുന്നു. കൂറുകച്ചവടം, വാങ്ങല്‍വില്‍പ്പന എന്നിവയില്‍ ഇസ് ലാമികമായി പരിഗണിക്കേണ്ട എല്ലാ നിയമങ്ങളും പരിഗണിച്ചുള്ള കമ്പനികളെ കണ്ടെത്തുക തീര്‍ത്തും പ്രയാസമാണല്ലോ. അങ്ങനെയുള്ള നിബന്ധനകള്‍ പാലിക്കുന്ന കമ്പനികള്‍ക്ക് ഇത്തരം ഇടപാടുകള്‍ നടത്താനും കഴിയില്ല. ഡേട്രേഡ് പോലെ തന്നെ മറ്റുപലപേരുകളിലുമായി സമാനമായതോ സാദൃശ്യമുള്ളതോ ആയ പല ഇടപാടുകളും മാര്‍കറ്റിലുണ്ട്. ഷോട്ട്സെല്ലിംഗ്, മാര്‍ജിന്‍സൈല്‍, ഒപ്ഷന്‍സൈല്‍(കാള്‍ ഒപ്ഷന്‍,പുട്ട്ഒപ്ഷന്‍) ഇവയിലെല്ലാം മുകളിലെ പലനിബന്ധനകളും നഷ്ടപ്പെടുന്നതിനാല്‍ അവയൊന്നും ഇസ്ലാമികമായി സാധൂകരിക്കാനാകുന്നില്ല. നാല് മദ്ഹബുകളുടെയും വിശാലമായ കാഴ്ചപ്പാടുകളോടെ നോക്കിക്കണ്ടാല്‍പോലും അത്തരത്തില്‍ പാലിക്കപ്പെടേണ്ട നിബന്ധനകള്‍ ഈ ഈടപാടുകളില്‍ കാണുന്നില്ല. ഹലാലായ മാര്‍ഗത്തിലൂടെ ധനം സമ്പാധിക്കാനും വിനിയോഗിക്കാനും നാഥന്‍ തുണയേകട്ടേ എന്ന് ദുആ ചെയ്യാം. കൂടുതല്‍ പഠിക്കാനും അറിയാനും അത് അനുസരിച്ച് പ്രവര്‍ത്തിക്കാനും അല്ലാഹു തൌഫീഖ് പ്രദാനം ചെയ്യട്ടേ.  

FEATURED QUESTION

ഖത്തറില്‍ ഇന്ത്യക്കാരുടെ ക്ഷേമത്തിന് വേണ്ടി പ്രവര്‍ത്തിക്കുന്ന ഇന്ത്യന്‍ കമ്മ്യൂണിറ്റി ബെനെവലന്റ്റ് ഫണ്ട് (ICBF) ഇവിടെ പ്രവര്‍ത്തിക്കുന്ന ഇന്ഷുറന്സ് കമ്പനിയായ ദമാന്‍ ഇന്ഷുറന്സ് (ബീമ) കമ്പനിയുമായി ചേര്‍ന്ന് പ്രവാസി ഇന്ത്യക്കാര്‍ക്ക് വേണ്ടി ലൈഫ് ഇന്ഷുറന്സ് പദ്ധതി തുടങ്ങിയിട്ടുണ്ട്. ഈ പദ്ധതിയില്‍ ചേരുന്നതിന്റെ വിധിയെന്താണ്? അതിലൂടെ ലഭ്യമാവുന്ന ആനുകൂല്യങ്ങള്‍ കൈപറ്റുന്നത് അനുവദിനീയമാണോ?.

| ചോദ്യകർത്താവ് ‍   നബീല്‍ മുഹമ്മദ്
| മറുപടി നൽകിയത്    ഫൈസല്‍ നിയാസ് ഹുദവി

ആകസ്മികമായി ഒരു വ്യക്തിക്കോ സ്ഥാപനത്തിനോ വന്നു ചേരുന്ന നാശനഷ്ടങ്ങൾക്ക് പരിഹാരമെന്നോണമാണല്ലോ ഇൻഷൂറൻസ് പദ്ധതികള് നടത്തപ്പെടുന്നത്. അത്തരം നാശനഷ്ടങ്ങൾ ഒരാൾ ഒറ്റയ്ക്ക് വഹിക്കുന്നതിന് പകരം കുറേപ്പേർ ചേര്‍ന്നു വഹിക്കുമ്പോള്‍ അത് വേഗം പരിഹരിക്കാന് കഴിയും. ഒരാളുടെ ബാധ്യത കുറേപ്പേര്‍ ചേര്‍ന്നു ഏറ്റെടുക്കുന്നതും  അത്തരം നഷ്ടസാധ്യതകളെ ഒരുമിച്ച് നേരിടുന്നതും അടിസ്ഥാനപരമായി ഇസ്ലാം പ്രോത്സാഹിപ്പിക്കുന്ന കാര്യങ്ങളാണ്. മനപ്പൂർവ്വമല്ലാതെയോ അബദ്ധത്തിലോ ഒരാളെ കൊന്നാൽ കൊല്ലപ്പെട്ടവന്റെ അനന്താരാവകാശികൾക് പ്രായശ്ചിത്ത ധനം നൽകണം. ഇവിടെ ഇത് നൽകി സഹായിക്കേണ്ടത് കൊലയാളിയുടെ അനന്താരവാകാശികളായാ പുരുഷന്മാരാണെന്നും അവർക്ക് കഴിയില്ലെങ്കിൽ ബൈത്തുൽമാൽ (പൊതു ഖജനാവിൽ) നിന്ന് എടുക്കണമെന്നും പൊതു ഖജനാവിലും അതിന് പരിമിതിയുണ്ടെങ്കിൽ ആ സംഖ്യ കൊലായാളി കണ്ടെത്തണമെന്നുമാണ് എന്ന് ഇസ്ലാം നിർദ്ദേശിക്കുന്ന രീതി (ഫത്ഹുൽ മുഈൻ, തുഹ്ഫ). യാദൃശ്ചികമായി വന്നു ചേരുന്ന ഒരു വലിയ സാമ്പത്തിക ബാധ്യത അദ്ദേഹത്തിന് ഒറ്റക്ക് വഹിക്കാന്‍ പ്രയാസം സൃഷ്ടിക്കുമെന്നതിനാല്‍ അത് അദ്ദേഹവുമായി ബന്ധപ്പെട്ട ഒരു കൂട്ടം ആളുകളിലേക്ക് വീതം വെക്കുന്നത്’. അബു മൂസ അൽ- അശ്അരി (റ) പറഞ്ഞു: അല്ലാഹുവിന്റെ റസൂൽ (ﷺ) പറഞ്ഞു, “അശ്അരി ഗോത്രക്കാര്‍ യുദ്ധസമയത്തോ  മദീനയിലെ വീട്ടിലായിരിക്കുമ്പോഴോ ഭക്ഷ്യവസ്തുക്കള്‍ക്ക് കുറവ് സംഭവിച്ചാല്‍, അവർ തങ്ങളുടെ എല്ലാ വിഭവങ്ങളും ഒരു ഷീറ്റിൽ ശേഖരിക്കുകയും പിന്നീട് പരസ്പരം തുല്യമായി വിഭജിക്കുകയും ചെയ്യുന്നു. അവർ എന്നിൽ നിന്നാണ്, ഞാൻ അവരിൽ ഒരാളാണ്. (ബുഖാരി, മുസ്‌ലിം) ഈ ഹദീസിനെക്കുറിച്ച് അഭിപ്രായപ്പെട്ട ഇമാം അൽ-നവവി (റ) പറഞ്ഞു: “ഈ ഹദീസ് അശ്അരി ഗോത്രക്കാരുടെ പുണ്യം, പരോപകാരത്തിന്റെയും ആശ്വാസത്തിന്റെയും നന്മ, യാത്രയിൽ (സഹയാത്രികരുടെ) പാഥേയം  ഒരുമിച്ചുകൂട്ടി ഉപയോഗിക്കുന്നതിലെ നന്മ, ഭക്ഷ്യക്ഷാമം നേരിട്ടാല്‍  (എല്ലാവരുടെയും) ഭക്ഷ്യവസ്തുക്കള്‍ ഒന്നിച്ചു ശേഖരിച്ച് തുല്യമായി വിഭജിക്കുന്നതിന്റെ മേന്മ എന്നിവയെക്കുറിച്ച് പ്രതിപാദിക്കുന്നു. ഫിഖ്ഹീ ഗ്രന്ഥങ്ങളില്‍ അറിയപ്പെടുന്നതും പലിശ നിരോധിച്ചിരിക്കുന്നതുമായ പങ്കുവെക്കലല്ല; മറിച്ച് ഇവിടെ പരസ്പരം ഓരോരുത്തരും തങ്ങളുടെ വസ്തുക്കള്‍ മറ്റുള്ളവര്‍ക്ക് അനുവദിനീയമാക്കുകയും ഉള്ളത് കൊണ്ട് പരസ്പരം ആശ്വാസം നല്‍കുകയുമാണ്. (ശറഹ് മുസ്‌ലിം 16/62). എന്നാൽ ആധുനിക ഇൻഷൂറൻസ് കമ്പനികൾ അധികവും ഇസ്ലാം നിരോധിച്ച പലിശ, ചൂതാട്ടം, ചൂഷണം, അനിശ്ചിതത്വം, അവ്യക്തത തുടങ്ങിയവയിലധിഷ്ഠതമായ ഇടപാടുകൾ  നടത്തുന്നത് കൊണ്ടാണ് അവയെ ഇസ്ലാം അംഗീകരിക്കാത്തത്. ലാഭേച്ഛയോടെ നടത്തപ്പെടുന്ന ഇടപാടുകളില്‍ (മുആവദാത്ത്) പാലിക്കപ്പെടേണ്ട ഇസ്‌ലാമിക നിയമങ്ങളില്‍ ഏറ്റവും പ്രധാനമാണ് കൈമാറ്റം ചെയ്യപ്പെടുന്ന വസ്തുക്കള്‍ അല്ലെങ്കില്‍ സേവനങ്ങള്‍ സംബന്ധിച്ച കൃത്യതയും വ്യക്തതയും. ഭാവിയില്‍ സംഭവിക്കാന്‍  സാധ്യതയുള്ള ഒരു കാര്യത്തിനു വേണ്ടി ഇടപാട് നടത്തുമ്പോള്‍ സ്വാഭാവികമായും ഈ നിയമം  പാലിക്കപ്പെടില്ല. അങ്ങനെ വരുമ്പോള്‍ ഒന്നുകില്‍ ലാഭേച്ഛകൂടാതെ പരസ്പരം പങ്കുവെക്കുന്ന ഇടപാടുകളുടെ  (തബര്‍റുആത്ത്) രൂപത്തിലോ ഇസ്‌ലാം അംഗീകരിച്ച സേവന – സംരംഭക ഇടപാടുകളുടെ അടിസ്ഥാനത്തിലോ വേണം ഈ ഇടപാടുകള്‍ ചെയ്യേണ്ടത്. അത്തരം സംവിധാനങ്ങള്‍ ഇന്ന് വളരെ വ്യാപകമായി നിലനില്ക്കുന്നുണ്ട്. തകാഫുൽ എന്നാണ് അവ അറിയപ്പെടുന്നത്. വ്യത്യസ്ത ഇസ്ലാമിക സാമ്പത്തിക സാമഗ്രികള്‍ ഉപയോഗപ്പെടുത്തിയാണ് ഈ സംവിധാനം പ്രവർത്തിക്കുന്നത്. പൂർണ്ണമായും ലാഭരഹിത സംവിധാനമായി പരസ്പര സഹകരണത്തിന്റെ അടിസ്ഥാനത്തിൽ പ്രവര്‍ത്തിക്കുന്ന തആവുനീ (സഹകരണ) മോഡൽ, നിശ്ചിത ഫീ വാങ്ങി ഫണ്ട് മാനേജ്ചെയ്യുന്ന  വകലാത്ത് (ഏജൻസി) മോഡൽ, സംരംഭക കരാറിന്റെ അടിസ്ഥാനത്തിൽ ലാഭം പങ്കുവെക്കുന്ന മുദാറബ (സംരഭകത്വ) മോഡൽ, ഇൻഷൂറൻസ് കൈകാര്യം ചെയ്യാന്‍ വകാലത്തും നിക്ഷേപം കൈകാര്യം ചെയ്യാന്‍ മുദാറബയും ഉപയോഗിക്കുന്ന വകാല-മുദാറബ മോഡൽ, ഫണ്ടിനെ ഒരു വഖ്ഫ് സ്വത്തായി മാറ്റി കൈകാര്യം ചെയ്യുന്ന വഖ്ഫ് മോഡൽ എന്നിങ്ങനെ വ്യത്യസ്ത രീതിയില്‍ ഇസ്ലാമിക താകാഫുല്‍ സംവിധാനങ്ങൾ പ്രവർത്തിക്കുന്നുണ്ട്. ഗൾഫ് രാഷ്ട്രങ്ങളില്‍ പൊതുവേ വകാല-മുദാറബ സംയോജിത മോഡലിലാണ് തകാഫുൽ കമ്പനികൾ പ്രവർത്തിക്കുന്നത്. ചോദ്യത്തില് പറയപ്പെട്ട ഇൻഷൂറൻസ് പദ്ധതി ഖത്തറിലെ പ്രമുഖ ഇസ്ലാമിക ഇൻഷൂറൻസ് സ്ഥാപനമായ ദമാൻ  ഇസ്ലാമിക് ഇൻഷൂറൻസ് (ബീമ) കമ്പനിയുമായി സഹകരിച്ചാണ്. കമ്പനി ഫണ്ട് സ്വീകരിക്കുന്നതും മാനേജ് ചെയ്യുന്നതും നിക്ഷേപിക്കുന്നതും വകാല-മുദാറബ അടിസ്ഥാനത്തിലാണ്. ഇവിടെ ഇൻഷൂറൻസ് മാനേജ്മെന്റിന് നിശ്ചിത ഫീ പോളിസിയിൽ നിന്നു ഈടാക്കുകയും ബാക്കി ഫണ്ട് ഹലാലായ നിക്ഷേപങ്ങളിൽ നിക്ഷേപിക്കുകയും ചെയ്യുന്നു. അതിൽ ലഭ്യമാവുന്നത് പദ്ധതി കാലയളവിൽ നേരത്തെ നിശ്ചയിക്കപ്പെട്ടപോലെ മരണപ്പെടുന്നവരുടെ ആശ്രിതർക്ക്  കൈമാറുന്നു. പദ്ധതി കാലാവധി അവസാനിക്കുമ്പോൾ നിക്ഷേപത്തിന് സംരംഭകനായ കമ്പനിക്ക് അനുവദിക്കപ്പെട്ട ലാഭ വിഹിതം ഒഴിവാക്കി ബാക്കിവരുന്ന സംഖ്യ ഇതിലെ പോളിസി ഉടമകൾക്ക് തിരിച്ചു നൽകുകയും ചെയ്യുന്നു. സ്ഥാപനത്തിന്റെ തന്റെ ശരീഅ  ബോഡിയും ഖത്തര്‍ സെന്ട്രൽ ബാങ്ക് നിശ്ചയിക്കുന്ന നിര്‍ദ്ദേശങ്ങളും പാലിച്ചുകൊണ്ടാണ് ഇത്തരം സ്ഥാപനങ്ങൾ  പ്രവർത്തിക്കാറുള്ളത്. ഓർഗനൈസേഷൻ ഓഫ് ഇസ്ലാമിക് കോഓപ്പറേഷൻ (ഒഐസി) കീഴിലുള്ള  ഇന്റർനാഷണൽ ഇസ്ലാമിക് ഫിഖ്ഹ്  അക്കാദമി 1435 മുഹർറം  15-19 തിയ്യതികളിൽ (2013 നവംബർ 18 മുതൽ 22 വരെ) റിയാദിൽ (സൗദി അറേബ്യ) നടന്ന അതിന്റെ ഇരുപത്തിയൊന്നാം സെഷനിൽ തകാഫുലുമായി ബന്ധപ്പെട്ട വിശദമായ ഫത്വയും നിര്‍ദ്ദേശങ്ങളും വ്യക്തമാക്കുന്നുണ്ട്. ഈ നിയമങ്ങൾ അടിസ്ഥാനപ്പെടുത്തി പ്രവര്‍ത്തിക്കുന്ന തകാഫുല്‍ പദ്ധതികളില്‍ അംഗമാകാവുന്നതും അതിൽ നിന്നു ലഭ്യമാവുന്ന ആനുകൂല്യങ്ങൾ കൈപറ്റാവുന്നതുമാണ്. എങ്കിലും ഇത്തരം ഇടപാടുകളില്‍ ചേരുമ്പോള്‍ അതിന്‍റെ ബന്ധപ്പെട്ട ആളുകളോട് അന്വേഷിച്ചു അവ ഇസ്‌ലാമിക നിയമങ്ങള്‍ പാലിക്കുന്നുവെന്ന് ഉറപ്പുവരുത്തണം. പലപ്പോഴും സന്നദ്ധ സംഘടനകൾ നടത്തുന്ന സാമൂഹ്യ ക്ഷേമ പദ്ധതികള്‍ പല കാരണങ്ങള്‍ കൊണ്ടും സാമ്പ്രദായിക ഇൻഷൂറൻസിനോട് സാദൃശമുള്ളതും അനിസ്‍ലാമികവുമായി മാറാറുണ്ട്.

ASK YOUR QUESTION

ചോദ്യങ്ങള്‍ പരമാവധി വ്യക്തമായി എഴുതുകയും മലയാളത്തില്‍ ടൈപ്പ് ചെയ്യുകയും ചെയ്യുക. മംഗ്ലീഷില്‍ എഴുതുന്നത് ഒഴിവാക്കുക . അക്ഷരത്തെറ്റുകള്‍ ഒഴിവാക്കാന്‍ ശ്രദ്ധിക്കുക. ഒന്നിലധികം ചോദ്യങ്ങള്‍ ഒന്നിച്ചു ചോദിക്കുന്നത് ഒഴിവാക്കുക.

ഇസ്‌ലാമിനെ കുറിച്ച്

സ്വഹാബിയായ അബ്ദുല്ല എന്നവര്‍ ആവർത്തിച്ചു തെറ്റ് ചെയ്തുവെന്ന് ഹദീസില്‍ കാണുന്നുണ്ട്. അപ്പോള്‍ ഒരുപാട് കാലം പിറകെയുള്ള നമ്മുടെ അവസ്ഥ എന്താണ്? ഉമര്‍ (റ) നിവേദനം: നബി(സ)യുടെ കാലത്ത്‌ അബ്ദുല്ല എന്നു പേരുള്ള ഒരാളുണ്ടായിരുന്നു. ജനങ്ങള്‍ അയാളെ (ഹിമാര്‍ ) എന്നാണ്‌ വിളിച്ചിരുന്നത്‌. അയാള്‍ നബി(സ)യെ തമാശ പറഞ്ഞ്‌ ചിരിപ്പിക്കാറുണ്ടായിരുന്നു. ഒരിക്കല്‍ മദ്യപിച്ച കാരണം നബി(സ) അയാളെ അടിച്ചു. വീണ്ടും മദ്യപിച്ചതുമൂലം അയാളെ നബിയുടെ മുന്നില്‍ കൊണ്ടു വന്നു. അപ്പോഴും നബിയുടെ കല്പനപ്രകാരം അനുചരന്മാര്‍ അയാളെ അടിച്ചു. കൂട്ടത്തിലൊരാള്‍ പറഞ്ഞു. അല്ലാഹു നിന്നെ ശപിക്കട്ടെ. എത്ര പ്രാവശ്യമായി നിന്നെ മദ്യപിച്ച നിലക്ക്‌ പിടിച്ചുകൊണ്ടുവരുന്നു. നബി(സ) അരുളി: നിങ്ങളയാളെ ശപിക്കരുത്‌. അല്ലാഹു സത്യം! അയാള്‍ അല്ലാഹുവിനെയും അവന്‍റെ ദൂതനെയും സ്നേഹിക്കുന്നുവെന്ന്‌ തന്നെയാണ്‌ എന്‍റെ അറിവ്‌ (ബുഖാരി) .

MOST POPULAR QUESTIONS
NEW QUESTIONS
കഴിഞ്ഞ പന്ത്രണ്ടു വര്‍ഷമായി ഞാന്‍ കടബാധിതന്‍ ആണ്..ഇപ്പോഴും നാല്‍പതു ലക്ഷത്തോളം രൂപ കടം ഉണ്ട് .അതില്‍ പതിനഞ്ചു ലക്ഷത്തിന്റെ സ്ഥലം എന്റെ പേരില് ഉണ്ട് .ഒരു ഇസ്ലാമിക നിക്ഷേപക സ്ഥാപനത്തില്‍ എനിക്ക് ഒന്നര ലക്ഷത്തോളം നിക്ഷേപം ഉണ്ട്.രണ്ടു ലക്ഷം രൂപ ചിലരില്‍ നിന്ന് കിട്ടാനും ഉണ്ട് .(പെട്ടെന്ന് കിട്ടുന്നത് അല്ല) ..ഞാന്‍ സകാത്ത് കൊടുക്കണോ ? ജീവിതത്തില്‍ ഇത് വരെ ഞാന്‍ സകാത്ത് കൊടുത്തിട്ടില്ല .എന്റെ ഭാര്യക്ക്‌ അറുപതു പവന്‍ സ്വര്‍ണ്ണം ഉണ്ട്.ഈ സ്വര്‍ണ്ണത്തിനു ഞാന്‍ സകാത്ത് കൊടുക്കണോ ?
സ്വഹാബിയായ അബ്ദുല്ല എന്നവര്‍ ആവർത്തിച്ചു തെറ്റ് ചെയ്തുവെന്ന് ഹദീസില്‍ കാണുന്നുണ്ട്. അപ്പോള്‍ ഒരുപാട് കാലം പിറകെയുള്ള നമ്മുടെ അവസ്ഥ എന്താണ്? ഉമര്‍ (റ) നിവേദനം: നബി(സ)യുടെ കാലത്ത്‌ അബ്ദുല്ല എന്നു പേരുള്ള ഒരാളുണ്ടായിരുന്നു. ജനങ്ങള്‍ അയാളെ (ഹിമാര്‍ ) എന്നാണ്‌ വിളിച്ചിരുന്നത്‌. അയാള്‍ നബി(സ)യെ തമാശ പറഞ്ഞ്‌ ചിരിപ്പിക്കാറുണ്ടായിരുന്നു. ഒരിക്കല്‍ മദ്യപിച്ച കാരണം നബി(സ) അയാളെ അടിച്ചു. വീണ്ടും മദ്യപിച്ചതുമൂലം അയാളെ നബിയുടെ മുന്നില്‍ കൊണ്ടു വന്നു. അപ്പോഴും നബിയുടെ കല്പനപ്രകാരം അനുചരന്മാര്‍ അയാളെ അടിച്ചു. കൂട്ടത്തിലൊരാള്‍ പറഞ്ഞു. അല്ലാഹു നിന്നെ ശപിക്കട്ടെ. എത്ര പ്രാവശ്യമായി നിന്നെ മദ്യപിച്ച നിലക്ക്‌ പിടിച്ചുകൊണ്ടുവരുന്നു. നബി(സ) അരുളി: നിങ്ങളയാളെ ശപിക്കരുത്‌. അല്ലാഹു സത്യം! അയാള്‍ അല്ലാഹുവിനെയും അവന്‍റെ ദൂതനെയും സ്നേഹിക്കുന്നുവെന്ന്‌ തന്നെയാണ്‌ എന്‍റെ അറിവ്‌ (ബുഖാരി) .
രോഗപ്പകര്‍ച്ചയെ പറ്റി ഇസ്‌ലാമിന്‍റെ കാഴ്ചപ്പാട് എന്താണ്? “ലാ അദ്’വാ” അഥവാ “രോഗം പകരില്ല”എന്ന് മുഹമ്മദ് നബി (സ) പറഞ്ഞിട്ടുണ്ടോ? “സിംഹത്തില്‍ നിന്ന് ഓടിയൊളിക്കും പോലെ കുഷ്ഠരോഗിയില്‍ നിന്നും നിങ്ങള്‍ ഓടിയൊളിക്കണം’’, “ആരോഗ്യമുള്ള(ഒട്ടകങ്ങളുടെ)കൂടെ രോഗമുള്ളവയെ വെള്ളം കുടിക്കാന്‍ കൊണ്ടുവരരുത്’’, ‘’ പ്ലേഗ് ബാധിത പ്രദേശത്ത് ചെല്ലരുത്” എന്നൊക്കെയുള്ള അധ്യാപനങ്ങൾ രോഗം പകരും എന്നതിന് തെളിവല്ലേ?