Thursday, 22 October 2020

മഥുരയിലെ ഈദ്ഗാഹ് മസ്ജിദ്: മാറുന്ന സംഘ് പരിവാർ അജണ്ടയും ആശ്വാസമാവുന്ന നരസിംഹ റാവു സർക്കാരിന്റെ ആരാധനാലയ നിയമവും

റാശിദ് ഓത്തുപുരക്കൽ

04 October, 2020

+ -
image

ബാബരി മസ്ജിദ് വിഷയം തങ്ങൾ ആഗ്രഹിച്ചതുപോലെ സംഭവിച്ചതിന് പിന്നാലെ ഉത്തർ പ്രദേശിലെ മഥുരയിൽ സ്ഥിതി ചെയ്യുന്ന ഷാഹി ഈദ്ഗാഹ്‌ മസ്ജിദ് പൊളിക്കണമെന്നും അത് കൃഷ്ണജന്മഭൂമിയാണെന്നും വാദിച്ച് കോടതിയെ സമീപിച്ച സംഘപരിവാർ പ്രവർത്തകരുടെ ഹരജി ഫയലില്‍ സ്വീകരിക്കാതെ കോടതി തള്ളിയിരിക്കുകയാണ്. മൗജ മഥുര ബസാര്‍ സിറ്റിയിലെ കത്ര കേശവ് ദേവ് ക്ഷത്രത്തിലെ ഭഗവാന്‍ ശ്രീകൃഷ്ണ വിരാജ്മാന്‍ എന്നാണ് ഹര്‍ജിക്കാരന്റെ പേര്. അതായത് ബാബരി കേസിൽ രാംലല്ല എന്ന രാമനെ ഹരജിക്കാരനാക്കിയത് പോലെ ശ്രീകൃഷ്ണനെ ഹരജിക്കാരനായി ചിത്രീകരിക്കുന്ന പഴയ വീഞ്ഞ് പുതിയ കുപ്പിയിലാക്കി അവതരിപ്പിച്ച നാടകമാണിത്. അടുത്ത സുഹൃത്തായ രഞ്ജന അഗ്നിഹോത്രി, ആറ് ഭക്തന്മാര്‍ എന്നിവരിലൂടെയാണ് സിവില്‍ കേസ് കോടതിയില്‍ ഫയല്‍ ചെയ്തിരിക്കുന്നത്.

17ാം നൂറ്റാണ്ടിൽ നിർമ്മിച്ച ഈദ്ഗാഹ് പള്ളി സ്ഥിതി ചെയ്യുന്നിടത്താണ് കൃഷ്ണന്‍ ജനിച്ചിരുന്നതെന്നും മഥുരയിലെ കൃഷ്ണ ക്ഷേത്രം തകര്‍ത്തത് 'മുഗള്‍ ആക്രമണകാരി'യായിരുന്ന ഔറംഗസീബാണെന്നും ഹര്‍ജിയില്‍ ആരോപിക്കുന്നു. ചില മുസ്‌ലിംകളുടെ സഹായത്തോടെ ശ്രീകൃഷ്ണ ജനമാസ്താന്‍ ട്രസ്റ്റിന്റെയും 'ദേവന്റെ'യും ഭൂമി കൈയേറ്റം ചെയ്യുകയും മസ്ജിദ് പണിയുകയും ചെയ്തുവെന്ന് ഹരജിയില്‍ അവകാശപ്പെടുന്നു.

രാമക്ഷേത്ര നിര്‍മ്മാണത്തിനുള്ള പ്രശ്‌നങ്ങള്‍ പരിഹരിക്കപ്പെട്ടുവെന്നും ഇനി കാശി, മഥുര മോചനത്തിനുള്ള സമയമാണിതെന്നുമുള്ള അഖാഡ പരിഷത്ത് അധ്യക്ഷന്‍ മഹന്ത് നരേന്ദ്ര സിങിന്റെ വാക്കുകൾ ബാബരിക്ക് ശേഷം ഹിന്ദുത്വ അജണ്ട നടപ്പിലാക്കാൻ മറ്റു മസ്ജിദുകളെ ലക്ഷ്യമിടുന്ന സംഘപരിവാറിന്റെ പുതിയ അടവുകളെയാണ് മനസ്സിലാക്കിത്തരുന്നത്. മഥുര ഈദ്ഗാഹിന് പുറമെ വാരണസിയിലെ ഗ്യാന്‍ വ്യാപി പള്ളിയും വിട്ടുനല്‍കണമെന്നും പരിഷത്ത് ആവശ്യപ്പെടുന്നുണ്ട്.

സംഘപരിവാറിനെതിരെ നാട്ടുകാരുടെ പ്രതികരണം

മധുര ഈദ് ഗാഹ് മസ്ജിദിനെ മറ്റൊരു ബാബരിയാക്കി മാറ്റാനുള്ള സംഘപരിവാന്റെ വാദങ്ങളോട് ശക്തമായ എതിർപ്പുമായി നാട്ടുകാരും പ്രദേശത്തെ മതേതര മനസിനുടമകളും രംഗത്തുവന്നിട്ടുണ്ട്. ഹരജിക്കെതിരെ മഥുരയിലെ പുരോഹിത സംഘം തന്നെ പ്രതികരിച്ചിട്ടുണ്ട്. മഥുരയിലെ സമാധാനം തകര്‍ക്കാന്‍ പുറത്തുനിന്നും ചിലര്‍ ശ്രമിക്കുന്നുവെന്നാണ് അഖില ഭാരതീയ തീര്‍ത്ഥ പുരോഹിത് മഹാസഭ അധ്യക്ഷന്‍ മഹേഷ് പഥക് പറഞ്ഞത്. ക്ഷേത്രവും പള്ളിയും സംബന്ധിച്ച്‌ യാതൊരു തര്‍ക്കവും നിലവില്‍ മഥുരയില്‍ നിലനില്‍ക്കുന്നില്ലെന്നും അദ്ദേഹം പറഞ്ഞു. 20-ാം നൂറ്റാണ്ടിന്റെ തുടക്കത്തില്‍ തന്നെ ഇതുസംബന്ധിച്ച ഒത്തുതീര്‍പ്പുകള്‍ നടന്നിരുന്നതാണ്. ഇപ്പോള്‍ ഉന്നയിക്കുന്ന തര്‍ക്കം അടിസ്ഥാനമില്ലാത്തതാണെന്നും അദ്ദേഹം പറഞ്ഞു.

സമാധാന കരാർ

ശ്രീകൃഷ്ണന്റെ ജന്മസ്ഥലം ആണെന്ന വാദം ഉയർത്തി പ്രശ്നങ്ങൾ സൃഷ്ടിക്കാൻ 1960കളില്‍ സംഘപരിവാർ ശക്തികൾ ശ്രമിച്ചിരുന്നു. എന്നാൽ പ്രശ്നം പരിഹരിക്കാനായി മസ്ജിദ്-ക്ഷേത്രഭാരവാഹികൾ ക്രിയാത്മകമായി പ്രവർത്തിച്ചു. ഭാരവാഹികള്‍ ചര്‍ച്ച നടത്തുകയും നിലവിലുള്ള സ്ഥിതി തുടരാമെന്ന് കരാറുണ്ടാക്കുകയും ചെയ്തു. ഈ കരാറിന് മഥുര കോടതി 1968ല്‍ അംഗീകാരം നല്‍കുകയും ചെയ്തിട്ടുണ്ട്.

നിലവിൽ ഈ കരാർ പൊളിക്കാൻ ക്ഷേത്രകമ്മിറ്റിക്കോ മസ്ജിദ് ഭാരവാഹികൾക്കോ താൽപര്യമില്ല. പുറത്തു നിന്ന് വരുന്നവരാണ് നാട്ടിൽ പ്രശ്നം ഉണ്ടാക്കുന്നതെന്ന നിലപാടിലാണ് ക്ഷേത്രകമ്മിറ്റി. ക്ഷേത്ര ഭാരവാഹികളും നാട്ടുകാരും നാട്ടിൽ കുഴപ്പമുണ്ടാക്കുന്നതിനെതിരെ നീങ്ങുന്നുണ്ടെങ്കിലും സംഘപരിവാർ, വിശിഷ്യാ ബിജെപിയുടെ ഭരണ സ്വാധീനത്തോടെ വർഗീയ പ്രചരണത്തിന് ഒരുങ്ങുന്നത് രാജ്യത്ത് വലിയ അപകടമാണ് സൃഷ്ടിക്കുക.

പ്രതീക്ഷയിലുള്ളത് 1991 ലെ ആരാധനാലയ നിയമം

മഥുരയിലെ മസ്ജിദ് തകർക്കാനുള്ള ഹരജി തള്ളി അഡീഷണല്‍ ജില്ലാ ജഡ്ജ് ഛയ്യ ശര്‍മ വിധി പ്രസ്താവം നടത്തിയത് 1991 ൽ നരസിംഹറാവുവിന്റെ നേതൃത്വത്തിലുള്ള കോൺഗ്രസ് സർക്കാർ നടപ്പിലാക്കിയ ആരാധനാലയ നിയമം അടിസ്ഥാനപ്പെടുത്തിയാണ്. ബാബരി മസ്ജിദിന് പുറമേ ഇന്ത്യയിലെ മൂവായിരത്തിലധികം പള്ളികൾ തിരിച്ചു കിട്ടണം എന്ന അവകാശവാദം വിശ്വഹിന്ദുപരിഷത്ത് നിരവധിതവണ പ്രഖ്യാപിച്ചത് മുന്നിൽ കണ്ടും രണ്ടായിരത്തിലധികം പേരുടെ മരണത്തിന് ഇടയാക്കിയ ബാബരിമസ്ജിദ് പ്രശ്നത്തിന്റെ ഉണങ്ങാത്ത മുറിവ് ആവർത്തിക്കാതിരിക്കാൻ ജാഗ്രത പാലിച്ചുമാണ് 1991 സെപ്റ്റംബറിൽ പ്രധാനമന്ത്രി നരസിംഹറാവു ഈ നിയമം നടപ്പിലാക്കിയത്. ഈ നിയമപ്രകാരം 1947 ഓഗസ്റ്റ് 15ന് ഒരു ആരാധനാലയം ആരുടെ ഉടമസ്ഥതയിൽ ആണോ അവരിൽ നിന്ന് പ്രസ്തുത ഉടമസ്ഥത മാറ്റാൻ പാടില്ല എന്ന് തീരുമാനിക്കപ്പെട്ടു. എന്നാൽ കേസ് നടക്കുന്നതിനാൽ ബാബരി മസ്ജിനെ ഈ നിയമത്തിൽ നിന്ന് ഒഴിവാക്കിയിരുന്നു.

1991 സെപ്റ്റംബർ 10-ന് ലോക്സഭയിൽ ബിൽ അവതരിപ്പിച്ചു കൊണ്ട് നടത്തിയ പ്രസംഗത്തിൽ അന്നത്തെ ആഭ്യന്തര മന്ത്രി എസ് ബി ചവാൻ പറഞ്ഞത് മുഴുവനും പഴയ മുറിവുകൾ ഉണക്കുന്നതിന്റെയും മതസൗഹാർദത്തിന്റെ പാരമ്പര്യം ഊട്ടിയുറപ്പിക്കുന്നതിന്റെയും പ്രാധാന്യത്തെപ്പറ്റിയായിരുന്നു. ഈ നിയമം നടപ്പിലായതോടെ ഒരു ആരാധനാലയത്തിന്റെ സ്വഭാവം മാറ്റുന്നത് സംബന്ധിച്ച് നിലവിലുള്ള എല്ലാ കോടതി കേസുകളും റദ്ദായി. യാതൊരു നിയമ നടപടിയും പിന്നീട് അവസരം ഇല്ലാതായി.

ഈ നിയമത്തിന്റെ സംരക്ഷണം ഉള്ളതുകൊണ്ട് തന്നെ മഥുരയിലെ ഈദ്ഗാഹ് മസ്ജിദിനും വാരാണസിയിലെ മസ്ജിദിനും പ്രശ്നം വരാനിടയില്ല. എന്നാൽ തീർത്തും വർഗീയ വൽക്കരിക്കപ്പെട്ട, ഭൂരിപക്ഷ ഹിതത്തിന് അനുസരിച്ച് വിധി പോലും നടപ്പിലാക്കുന്ന പുതിയ ഇന്ത്യയിൽ ഈ നിയമത്തിന്റെ സംരക്ഷണം എത്രമാത്രം ഉണ്ടാവുമെന്ന് ഉറപ്പു പറയാനാവില്ല. ലോക്സഭയിലും രാജ്യസഭയിലും ഭൂരിപക്ഷത്തോടെ ഭരണം നടത്തുന്നതിനാൽ പുതിയ നിയമങ്ങൾ ഉണ്ടാക്കുന്നതിന് ബിജെപിക്ക് വലിയ പ്രശ്നവും ഉണ്ടാകില്ല. സാമ്പത്തിക സ്ഥിതിയിലും സ്ത്രീ സുരക്ഷയിലും കോവിഡ് പ്രതിരോധത്തിലും അമ്പേ പരാജയമായ ബിജെപിക്ക് ഭരണം നിലനിർത്തണമെങ്കിൽ പുതിയ വർഗീയ വിഷയങ്ങൾ ഉയർത്തിക്കൊണ്ടുവരൽ അനിവാര്യമാണെന്ന് അറിയാതിരിക്കില്ല. അതിനുള്ള എല്ലാ അടവുകളും ഒരു പക്ഷെ അണിയറയിൽ രഹസ്യമായി ഒരുങ്ങുന്നുണ്ടാവാം.